Over de schriever

Even veurstellen

Mien noam is Bram Wiekens.
Sunt n joar of vieftien schrief ik verhoalen. Eerst in t Nederlands, mor al snel bin ik overstapt op t Grunnegs. d’Eerste verhoalen speulen hoast zunder oetzundern in mien geboortedörp Olde Pekel.

Noa n körte periode van vief joar op t Hoogezaand, woon ik nou al weer datteg joar op Ommelanderwieke, de Wieke dus. Het is doarom denk ik ook logisch, dat de maiste van mien verhoalen zok doar ofspeulen.

In 2013 is mien bouk ‘Koakelbonen’ bie oetgeverij Noordboek verschenen.
In d’haarfst van 2015 bin ik begonnen mien aigen verhoalenwinkel op t internet vörm te geven.
In 2016 hebben we dij winkel aan d’boetenkaante wat opklanderd, mor in de schappen van d’winkel is waineg veraandern kommen. Behaalve dat ik ‘Bie pad en weg’ de maist biezundere zoaken tegenkom, blieven ook mien buren Anjolt en Ketriene mie veurzain van redelk veul schriefonderwaarpen, net as ons dörpsveldwachter mit zien dubbele achternoam en ook ons klaainkinder kommen voak mit verazzende opmaarkens oet d’houke. Woarmit ik mor dudelk moaken wil, dat n schriever den wel n dikke doeme hebben mag, zunder aal dij inspiroatsiebronnen om hom tou zolt oardeg wat minder interessant wezen. Doarom bin ik ook zo bliede, dat professor Luttje van t Grunneger Bero veur Toalonderzuiken òf en tou n biedroage levert.
In de zummer van 2016 heb ik twij nije series aan de winkel touvougd. Zo het dokter Anders Wieske mie beloofd dat e ain moal in de moand vroagen van braifschrievers over allerhande problemen gaait beantwoorden, mor woar’k hail trotsk op bin, is de oeteindelke touzeggen van Ampel en zien vraauw Piekie om heur belevenizzen mit mie en dus ook mit joe te dailen.