21 december , 2021 by admin

Medallie

t Is 21 dezember.
Körtste dag van t joar. Oflopen nacht was t kold. Heldere moan, hè. En gain spiertje wind.
Ik kondeg t al doagen laank aan. Veurege weke heb k t perbaaierd aan Anna oet te leggen, hou t zit mit zun en keerkringen en òfwizzeln van joargetieden.
‘Nog even deurzetten en wie goan de goie kaante weer op.’
Dat juust 21 dezember mie zo bezegholdt blift ook veur mie zulf n onbeantwoorde vroage.
‘Is t n verlangen noar waarmer weer?’
Denk t hoast nait. Haarfst en winter binnen mien favoriete seizoenen.
Vanmörgen lees k dat de veur mie maist aansprekende Vraize Elfstedenwinnoar, ieskenien Reinier Paping, dij mit laange onderboksem en kraant veur de borst barre tocht in ’63 in zien allaintjes wonnen het, oet tied kommen is. Verhoalen van oom Haarm, dij dijzufde tocht ook oetreden het, stoan mie in t geheugen grift. t Dut mie wel wat.
Kaggel in blokhut komt langsoam aan loop. Trek is der nait recht. Dikke rookplumen sieren heldere locht. k Zai t, mor zeg niks.
‘Magst wel stoken,’ roadt Arineke mien gedachten onder t appelsienpaarzen.
‘As buren mor nait kloagen,’ denk ik.
‘Over vief menuten brandt kaggel goud en binnen rookplumen verdwenen,’ zeg ik geruststellend.
Wietske jagt op niks deur toene over witbesloagen gras. Zai holdt net as ik van kolde.
t Is nog gain negen uur, as kaggel begunt te hoelen.
’t Zel de wind wezen,’ wait ik zeker.
Ain blik vanachter haalfopen gedientjes ontkent mien veronderstellen. Vanoet mien kolde zitploats, 6°, zai k dat rook oet cv-verwarmingspiep recht omhoog kringelt. t Belooft n mooie heldere vraisdag te worden en mit t wankele veuroetzicht dat n witte kerst meugelk is, zai k Arineke mit mien gloaske sap op toenpad.
‘Was k hailemoal vergeten.’
t Is 10 uur as k fietse onder t gat sloa. t Vrust nog 3°. Toch mout ik der even oet. Kaggel redt zok wel n uurtje zunder bievullen.
‘Is t nait te kold?’ woarschaauwt Arineke.
‘Kold?’ zeg ik en k mout weer denken aan Paping, dij mit 10° onder nul 200 kilometer, mit n gevoulstemperatuur van -20° haarde oostenwind en opwaaiende snijdunen overwonnen het. En wonnen. n Historische overwinnen.
‘As t toch n ìndje fietsen gaaist, kist Christina den nummer 146 even brengen.’
Wie spoaren soamen mit wat old-kollegoas van Arineke olifantploatjes van ‘Historisch Veendam’.
Ons album is vol, Christina mout nog aine. Wat soamenwaarken vermag.
Nog mor 100 meter van hoes schrik ik van n knalpiepe en k zai n tel loater n auto dij op twij wielen de bochte bie Nummer Aine nemt. Onverantwoord, ook al ridt der op dat mement gain aander. Ervoaren het leerd, haardrieders binnen voak gain vrumde gasten. Hai mout bekìnd wezen mit de situoatsie. Voak beuren dit soort snelhaidsovertredens bie oavendtied, as t echt stil is bie pad en weg. k Stop en konstateer, achteromkiekend, dat e nog wat gas biezet. Bie t hobbeltje bie PMF komt e even mit vaar wielen van de grond.
Oversteek bie t plaain is gevoarlek. Ook bie normoal langsriedend verkeer. Zicht veur overstekende fietsers en voutgangers is bepaarkt. k Wait t, want ik kom der doaglieks mit honden langs. Op hìnraaize wordt mie t zicht ontnomen deur dukdaalven, verschaaiden containers en t aanwiezensbord veur t Wiekster Rondje. Op terograaize duurf k nait over t zulfde fiets-looppad. Oet vaileghaidsoverwegens. Doar oversteken is n soort Russische roulette. Links staait noamelk n camper en aans wel n auto, dij t gezichtsveld noar t westen belemmert. Rechts staait n hoge baarkenhege en wilst zain wat der van rechts komt, moust minstens n meter op weg goan stoan. Ik kais den nait de gewone weg, mor schoef n meter of vieve noar t westen en neem zoals eertieds  weg over t plaain.
Woarom ik zo oetgebraaid dit oversteekpunt aan joe veurleg, komt omreden dat ik nogal wat schuldgevoulens heb. Hou t kin? As lid van WBB – Wiek- en Buurtbeheer – bin k ain van aanpittjeders west om hier n vailege oversteek te realiseren veur fietsers en nou zit ik, net as zoveul aander lu mit de gebakken peren.
Op terograaize, op weg noar hoes en kovvie, bin k over Drijbörghweg fietst. Doar ligt sunt kört, vanòf Lloydsrotonde noar Zuudwenden/de Wieke n kompleet nij fietspad. Mit n haalfmeters stainen middenbaarm as òfschaaiden tussen weg en fietspad. Was ook n aandachtspunt veur t WBB.
Huiven kinder van onze dörpen, mor ook achterlanders oet Pekel en nog verder weg nait meer gevoarleke oversteek te moaken bie Leenbakker.
k Bin mie veur de zoveulste keer bewust, plannenmoakers nemen n grote verantwoorden op scholders. Dat ik doar in 2009 n medallie veur kregen heb, vin k, achteròf bekeken echt te veul ere.
20211221